Ladino |
 Sentro del Patrimonio Djudio de las Komunidades de Salonika i Grechaen Memoria de Leon Recanati (1890-1945) Es un espasio esperiensial, domestiko i inspirador, ke fonksiona komo kaza a la komunidad djudia grega i a kualkiera persona ke dezee regresar por unos momentos por el tunel del tiempo. El sentro prezenta la vida de la komunidad djudia de Salonika, su djente, su istoria, su pasadia, el mundo kulinario de esta komunidad, su lengua (el djudeo espanyol) i la kreasion literaria en esta lengua, la muzika i la relijion. El sentro avre una puerta para konoser un mundo yeno de alegria i bivez i fragmentos de istoria olvidada. El sentro fue establesido en 2010 por su fundador, el Sr. Leon Recanati, miembro de la komunidad djudia de Salonika, kon una mision: azer ke se eskuche la boz de la komunidad, revelar la rikeza de su kultura espesial i permitir ke la segunda i tersera djenerasion konoskan, token i eksploren mas i mas esta erensia. Durante los anyos de su aktividad, el sentro avia ospitado estudiantes, grupos de soldados, embashadores, figuras klave del mundo de la politika i los negosios, investigadores, i espesialmente, miembros de famiyas orijinarias de las komunidades gregas. Estos ultimos topan en el sentro una kaza kaloroza, kon fragmentos de rekuerdos de la kaza de padre i madre, un mundo majiko ke pertenese al pasado. Ke ay en el sentro?En el koro del sentro ay una ekspozision permanente ke konta el kuento istoriko de la prospera komunidad desde sus primeros dias, su importansia komo una kalamita para los savios, i prezentasion detalyada de unos puntos importantes de referensia en su istoria. Kon el buto de avrir una ventana a la apasionante kultura de los miembros de la komunidad, se pezentan en la ekspozision unos artikolos unikos, ke los vizitantes estan invitados a sentir i estudiar: Una espasioza sala de estar, un komodo kanape i poltronas tipikas, autentikos livros de lektura i referensia, una kantonada atraktiva de komer, manteles bordados, servisios, variedad de komidas delisiozas de la gastronomia lokal, radios i artikolos dekorativos. Todo esto reflekta, de una manera muy autentika i muy prechiza, la vida yena i kumplida ke fue kortada i interrompida enduna. La sala komemorativa sirve komo un testimonio importante del Olokosto de los djudios de Grecha, ke ainda no avia resivido la atension nasional ke merese. La istoria de boka de un testigo también ayuda a profundizar el konosimiento de la doloroza istoria de los miembros de la komunidad. La biblioteka sentral permite proyeksion de filmos i dar konferensias en un espasio agradavle ke inkluye sientos de livros i adornos antiguos. La sala de arte invita a los estudiantes a eksplorar la rikeza de la kultura i aplikar diferentes teknikas kreativas eyos mizmos. La sala se utiliza tambien para ekspozisiones varyavles. Las aktividadesEl personal del sentro dezvelopo una ancha variedad de aktividades apropiadas para kada publiko i para todos eskopos, desde programas edukativos para elevos de eskolas primarias, pasando por aktividades de investigasion para estudiantes, konosimiento kultural a soldados, reuniones familiales i nochadas kulturales i linguistikas. Estash invitados todos a partisipar en las aktividades ke mas vos konvengan. . |
||